میدان وردګو کې د مڼو د۷۱ صفر درجې سړوخونو چارې په بشپړېدو دي

۸ لیندۍ ۱۳۹۹
د میدان وردګو ولایت د کرنې، اوبولګولو او مالدارۍ ریاست چارواکي وایي، چې د کرنې وزارت د کرنیزو محصولاتو مدیریت د پروژې په اډانه ددې ولایت د مڼو دحاصلاتو ساتنې او د خوساکېدو د مخنیوي په پار د ولایت په کچه د مڼو ۷۱ صفر درجې سارک سړو خونو جوړول پیل کړی، چې دمګړۍ یې رغنیزې چارې څه باندې ۷۰ سلنه بشپړ شوي دي او پاتې چارې به یې هم ډېر ژر بشپړ او ګټې اخیستنې ته به وسپارل شي.
د میدان وردګو د کرنې، اوبولګولو او مالدارۍ رییس ولید احمد تسل وایي، چې ددغو سړوخونو د جوړولو ټولیز لګښت ۱۸۴ میلیونه او ۶۰۰ زره افغانۍ ده، چې ۹۰ سلنه لګښت یې دکرنې وزارت او لس سلنه لګښت یې برخمن شوي بزګران ورکوي.
د ښاغلي تسل په خبره یادې پروژې د بڼوالو او بزګرانو دمحصولاتو خوندي کولو او د دوی د عوایدو زیاتولو په پار پلي شوې دي.
د میدان وردګو ولایت د رکرنې، اوبولګولو او مالدارۍ ریاست رییس ولیداحمد تسل دغه راز وویل، چې ددې ولایت په مرکز میدان ښار کې د ۵۰۰ مټریک ټنو په وړتیا او په سیدآباد ولسوالۍ کې د ۱۵۰۰ مټریک ټنو په وړتیا دوه سړې خونې تر دې مخکې هم جوړ شوي دي، چې د بزګرانو د محصولاتو په خوندي کولو او اقتصادي وده کې رغنده رول لوبوي.