ملت ته د حساب ورکونې په کنفرانس کې دکرنې وزارت مسلکي مرستيال له خوا ددې وزارت يوکلن کړنې بيان شول
۱۱ زمری ۱۴۰۱ه.ش
۴ محرم الحرام ۱۴۴۴ ه.ق
دکرنې، اوبولګولو او مالدارۍ وزارت چارواکو نن دحکومت داطلاعاتو او رسنيو په مرکز کې، ملت ته د حساب ورکونې په پروګرام کې د کرنې وزارت دکړنو يو کلن راپور له ملت او رسنيو سره شريک او د خبريالانو پوښتنو ته ځوابونه ورکړل.
دکرنې، اوبولګولو او مالدارۍ وزارت دکرنې او مالدارۍ مرستيال مولوی صدراعظم په دې کنفرانس کې د هېواد په اقتصاد کې د کرنې پر اهميت ټينګار وکړ او ويې ويل: د بزګرانو د اقتصادي ودې په پار، او دکرنې، خوړو خونديتوب مالدارۍ او ځنګلونو په ساتنه کې داسې چارې ترسره شوي دي، چې په تېرو شلو کالو کې يې څارې نه ليدل کېږي.
مولوی صدراعظم د هېواد په کرنه کې د قوشتيپې کانال مهمه پروژه وبلله او زياته يې کړه: "موږ بزګرانو مالدارانو او په ټوله کې خلکو ته داسې فعاليتونه ترسره کوو چې دکرنې په برخه کې پرځان بسيا شو.
کوم ځنګلونه چې په تېر ۲۰يا۴۰ کالو کې قطع شوي ول موږ ورته داسې ميکانيزم جوړ کړل، چې خوندي شي، د پستې ځنګلونه هم مديريت شوي دي او موږ وکولای شول، چې دغه ځنګلونه کنټرول کړو او د جلغوزې په برخه کې مو بازار موندنه وکړه.
په همدې حال کې دکرنې، اوبولګولو او مالدارۍ وزارت د اطلاعاتو او عامه اړيکو رييس مولوی مصباح الدين مستعین ددې وزارت د يوکلن لاسته راوړنو بشپړ جزياتو ته اشاره وکړه، ښاغلی مستعين وويل: "دکرنې، اوبولګولو او مالدارۍ وزارت ډېر زيات فعاليتونه لري خو په څلورو برخو کې خلاصه شوي دي،د بڼوالۍ او کرنيزو محصولاتو توليد، د طبيعي سرچينو تلپاتې او دوامداره ملاتړ، د کمي او کيفي له اړخه د مالدارۍ د توليداتو زياتوالی او اداري چارې پرمخ وړل دي.
دکرنې، اوبولګولو او مالدارۍ وزارت د اطلاعاتو او عامه اړيکو رييس په خپلو خبرو کې وويل، چې دکرنې وزارت په پام کې لري، ترڅو په راتلونکې کلونو کې هم خپلې برنامې او پلانونه په سمه توګه پلي او بڼوالو، بزګرانو او مالدارانو ته ډېرې زياتې چوپړتياوې وړاندې کړي.
