مخابراتي شرکتونو څخه د پرونو راټولولو له لارې د عوایدو زیاتوالي په پار د کرنې وزارت هڅې
۲۰ تله ۱۴۰۴ هـ.ش
۱۹ رَبِیعُ الْثاني ۱۴۴۷ هـ.ق
د کرنې، اوبو لګولو او مالدارۍ وزارت د مالي او اداري معینیت په نوښت، د افغانستان بېسیم، اټوما، اتصالات، روشن او سلام مخابراتي شرکتونو له مسؤلینو سره د همغږۍ ناسته ترسره شوه. د دې ناستې موخه د شرکتونو د پورونو د ورکړې بهیر ارزونه او د کرنې وزارت او خصوصي سکتور ترمنځ د همکارۍ پیاوړتیا وه، څو د امارت عواید لا زیات شي.
د کرنې وزارت مسؤلینو په دې ناسته کې د مخابراتي شرکتونو لهخوا د دولتي ځمکو د کرایې منظم تادیې اهمیت ته اشاره وکړه او څرګنده یې کړه، چې د کرایې پر وخت ورکړه د اقتصادي ودې، د پراختیایي پروګرامونو د ملاتړ او د کرنیزو خدمتونو د تأمین په برخه کې مهم رول لري.
د مخابراتي شرکتونو استازو د کرنې وزارت له همکارۍ مننه وکړه او ژمنه یې وکړه، چې ژر به خپل پورونه تصفیه کړي او د افغانستان اسلامي امارت د عوایدو د زیاتوالي په برخه کې به خپلې همکارۍ ته دوام ورکړي.
باید وویل شی، چې مخابراتي شرکتونه هر کال د خپلو انتنونو د نصبولو په بدل کې، چې په امارتي ځمکو کې ځای پر ځای شوي، دولت ته د ځمکې کرایه ورکوي، او د کرنې وزارت هڅه کوي، چې د ښه همغږۍ او تفاهم له لارې د دغو کرایو د منظم تادیې بهیر لا اغېزمن کړي.
