لوګر کې د نیالګیو اېښودو کمپاین پیل شو

۱۷ کب ۱۳۹۹
د لوګر د کرنې، اوبولګولو او مالدارۍ ریاست وایي، چې په دې ولایت کې د «زرغون لوګر» په نوم د نیالګیو اېښودو کمپاین د شنبې په ورځ پیل شوی دی، چې یوه اوونۍ به دوام ولري.
یاد کمپاین د لوګر والي عبدالقیوم رحیمي او دیاد ولایت د یوشمېر سیمه ییزو چارواکو او اوسېدونکو په ګډون د لوګر ولایت د پوهنتون له انګړ څخه پیل شو.
د لوګر والي عبدالقیوم رحیمي د دې کمپاین په پیل کې وویل، چې سږ کال به د دغه ولایت د مرکز پل علم په ګډون په ټولو ولسوالیو کې ۲۰۰ زره مېوه لرونکي او بې میوې نیالګي کېښودل شي.
ښاغلی رحیمي وویل: «هڅه مو داده، چې د نورو برخو ترڅنګ د لوګر ولایت ښکلا او زرغونتیا ته هم ډېره پاملرنه وکړو.»
نوموړي د لوګر له دیني عالمانو، قومي مشرانو او د مدني ټولنې له غړیو وغوښتل چې، د خپل هېوا د زرغونتیا لپاره له دولت سره اوږه په اوږه کار وکړي، ترڅو یو اباد او ښېرازه ولایت ولرو.
په همدې حال کې د لوګر ولایت اوسېدونکي هم خوښ دي، چې ددې ولایت په مرکز پل علم او ولسوالیو کې د نیالیګو اېښودو کمپاین پیل شوی دی. دوي وایي چې د لوګر ولایت اوسېدونکي د دغه کمپاین هرکلۍ او ملاتړ کوي.