لغمان کې د دوو کانالونو او یوه سربند رغنیزې چارې پيل شوې
۳ لېندۍ ۱۴۰۳ه.ش
۲۱ جُمَادَى الأول ۱۴۴۶ه.ق
د لغمان دکرنې، اوبولګولو او مالدارۍ ریاست چارواکي وایي، چې ددې ولایت په مرکز مهترلام ښار کې د دوو کانالونو او د دغه ولایت په قرغیو ولسوالی کې د یوه سربند رغنیزې چارې پيل شوې دي.
ددې پروژې په پرانیست غونډه کې د لغمان والي شیخ شیراحمد حقاني، دکرنې رییس مولوي عبدالستارمحمد، داقتصاد رییس مولوي جان محمد حامد، د اکشن ایډ مؤسسې دسي.بارډال پروژې ولایتي مسؤل ګل ویس وزیر او یوشمېر سیمه ییزو چارواکو ګډون درلود.
د لغمان والي شیخ شیراحمد حقاني وویل: «لغمان کې د امارت او مؤسسو په هڅو پر بېلابېلو پروژو اساسي کارونه روان دي. ددې ولایت پراختیایي برخې ته ډېره پاملرنه شوې او موږ د خلکو د هوساینې لپاره په اساسي او ټولګټو پروژو کار کوو.»
د لغمان ولایت د کرنې، اوبو لګولو او مالدارۍ رییس مولوي عبدالستار محمد وویل، چې دغه کانالونه او سربند د ملګرو ملتونو د پرمختیايي پرواګرام په مالي او د اکشن اېډ مؤسسې په تخنیکي همکارۍ د ۱۴ میلیونه افغانیو په لګښت جوړېږي، چې د سیمې کروندګرو ته به ګڼې اسانتیاوې برابرې شي.
نوموړي زیاته کړه، چې دغه دوه کانالونه د مهترلام ښار په اباخېلو او کمال پور سیمو کې او یو سربند د قرغیو ولسوالی په تومان سیمه کې جوړېږي، چې د رغونې چارې به یې په راتلونکو دوه میاشتو کې بشپړې شي.
د یادونې وړ ده، چې د دغو کانالونو او سربند په جوړېدو سره به د سیمې ۲۲زره جریبه ځمکه خړوبه شي او سلګونو کسانو ته په مستقیم او غیر مستقیم ډول د کار زمینه برابره شي.
بل لور ته د سیمې خلکو بیا د کرنې او اقتصادي پیاوړتیا په برخه کې دا ډول پروژې ډېرې ګټورې وبللې هغوی له ولایتي ادارې او اړوند ریاستونو څخه مننه وکړه، چې ددوی لپاره داسې بنیادي پروژې پلي کوي.
