سوېلختیځو ولایتونو د کرنې وزارت له لوري کډوالو ته د غنمو او نغدي مرستو د وېش بهیر پیل شو
۲ سلواغه ۱۴۰۴ه.ش
۳ شَعبان المُعَظّم ۱۴۴۷ه.ق
د کرنې، اوبو لګولو او مالدارۍ وزارت د عالیقدر امیرالمؤمنین حفظهالله تعالی د پرېکړې له مخې، په ټول هېواد کې بېوزلو راستانه شویو کډوالو ته د غنمو او نغدي مرستو د وېش بهیر پیل کړی دی.
په همدې موخه، د ځنګلونو د تنظیم رییس ملا سراجالحق میرویس «ذاکري» په مشرۍ پلاوي، چې ورسره د یاد وزارت یو شمېر تخنیکي او اداري کارکوونکي ملګري ول، د سوېلختیځو ولایتونو (پکتیا، خوست، پکتیکا او غزني) ته د سفر پر مهال له اړوندو ولایتي چارواکو سره هر اړخیزې غونډې ترسره کړې.
یاد پلاوي د دغو ولایتونو له والیانو او د کډوالو د ځمکو د وېش له ولایتي کمېټو سره، چې د ولایت دفتر، د کرنې، صنعت او سوداګرۍ، د کډوالو ریاستونه او مستوفیت پکې شامل وو، د مرستو د لېږد، تنظیم او عادلانه وېش پر څرنګوالي مفصل بحثونه وکړل، څو یادې مرستې پر وخت او په شفاف ډول مستحقو کورنیو ته ورسېږي.
همدارنګه، د ولایتي مسؤلینو سره په ګډه د غنمو د لېږد، ذخیرې او عادلانه وېش پر میکانیزمونو مفصل بحثونه وشول، څو یادې مرستې پر وخت او په شفاف ډول مستحقینو ته ورسېږي.
چارواکو ډاډ ورکړ چې د یاد فرمان د پلي کېدو په لړ کې به ټولې هڅې وشي، څو بېوزله راستانه شوي کډوال پر وخت او منظم ډول له دغو مرستو څخه برخمن شي.
د معلوماتو له مخې، تر دې دمه د پکتیا ولایت ته د غنمو انتقالات بشپړ شوي، د خوست ولایت لپاره د غنمو بارګیري نن د مرکزي سیلو څخه بشپړېږي، او همدارنګه د پکتیکا او غزني ولایتونو لپاره د غنمو بارګیري د کندهار ولایت څخه پیل شوې او د انتقال بهیر یې روان دی.
دا په داسې حال کې، ده چې د کرنې، اوبولګولو او مالدارۍ وزیر مولوی عطاءالله عمري له خوا دغه بهیر د بغلان، سمنګان، تخار، بدخشان او کندز په ولایتونو کې پیل شوی او په نورو ولایتونو کې به هم ډېر ژر پیل شي.
د کرنې، اوبو لګولو او مالدارۍ وزارت ټینګار کړی، چې د یادې پروسې د بریالي تطبیق لپاره به له ټولو اړوندو ادارو سره نږدې همغږي روانه وي، څو راستانه شوي کډوال پر وخت له دغو بشري مرستو څخه ګټه پورته کړي.
