سمنگان کې د ۱۸۰ هکټاره ځنګلونو دبیارغونې په پار د ۷۳۵ زره یورو په ارزښت پروژه پیل شوه

۱۳ لیندۍ ۱۳۹۹
د سمنګانو ولایت د کرنې، اوبولګولو او مالدارۍ ریاست وایي، چې ددې ولایت د ۱۸۰ هکټاره ځنګلونو او طبیعي ښکلاوو د بیارغونې په پار د ۷۳۵ زره یورو په ارزښت یوه پروژه په فعالیت پیل کړی دی.
دغه پروژه، چې د المان دولت په مالی لګښت په لاره اچول شوې ده، په پلي کېدو سره یې ټاکل شوې، چې د حضرت سلطان په ولسوالۍ کې د ۱۸۰ هکټاره ځنګلونو او طبیعي ښکلاوو د بیارغونې په پار ۳۰ زره نیالګي کېنول شي. دغه پروژه د بېوزلۍ پر وړاندې د پانګونې پروژې له خوا پلي کیږي.
د سمنګانو ولایت د کرنې رییس محمدرحمن ارغندوال وایي، چې د ځنګلونو او طبیعي ښکلاوو د بیارغونې ددې پروژې په پیل سره سلګونو کسانو ته د کار زمینه برابریږي. هغه وویل، چې ددې پروژې موخه د ځنګلونو او طبیعي ښکلاوو بیارغول دي او ټاکل شوې، چې ددې پروژې له لارې په ۱۸۰ هکټاره ځمکه کې د پستې، بادامو، چهارمغزو او نورو ونو نیالګي کېنول شي او ترڅنګ یې د انجې طبي بوټي او بومي ګیاوې وکرل شي. هغه وویل، چې ددې پروژې په پلي کېدو سره ټاکل شوې، چې د زرګونو کارکوونکو له خوا ۱۴ زره او ۴۰۰ غوچوړې هر یوه یې د څلورو مترو په اوږدوالی وکېندل شي.
دا درې کلنه پروژه، چې د دوو کړیو ژورو څاګانو کېندل او د نیالګیو د خړوبولو په پار لمریز دستګاه نصبول هم په کې شامل دي.