سرپل کې پر دوه زره او ۵۰۰ بزګرانو د غنمو اصلاح شوي تخمونه او کیمیاوي سرې وړیا ووېشل شوې

۲۲ لیندۍ ۱۳۹۹
د سرپل ښار مرکز او ددې ولایت د سانچارک او ګوسفندي ولسوالیو پر یوشمېر بزګرانو په وړیا توګه د غنمو د اصلاح شویو تخمونو او کیمیاوي سرو د وېش لړۍ ددې ولایت د سیمه ییزو چارواکو او یوشمېر بزګرانو په شتون کې، د سرپل والي عبدالقادر آشنا له خوا د پټۍ په پرې کولو سره پیل شو.
د سرپل والي عبدالقادر آشنا د اصلاح شویو تخمونو او کیمیاوي سرو د وېش په پار د کرنې ریاست او د "زوا" دفتر د نوښت ستاینه وکړه او له بزګرانو غوښتنه وکړه، چې د کرنې ریاست د حرفه اي کارکوونو په سلامشورې دې دغنمو اصلاح شوي تخمونه وکري ترڅو ښه حاصلات تر لاسه کړي.
هغه ګواښ وکړ چې هیڅ بزګر ددې غنمو د پلور حق نه لري او که چېرې دا غنم خرڅیږي له پېرېدونکو او پلورونکو سره قانوني چلند کیږي.
بلخوا د سرپل ولایت د کرنې، اوبولګولو او مالدارۍ رییس محمدسلیم رنجبرچې، د غنمو د اصلاح شویو تخمونو او کیمیاوي سرو په وېش غونډه کې خبرې کول وویل: د سرپل دکرنې، اوبولګولو او مالدارۍ ریاست د "زوا" دفتر په همکارۍ له یوې دقیقې سروې وروسته د سرپل ښار مرکز او ددې ولایت د سانچارک او ګوسفندي ولسوالیو پر دوه زره او ۵۰۰ بزګرانو یویو بوجۍ د غنمو اصلاح شوي تخمونه، سپینه او توره سره وېشي، چې ددې لړۍ تر بشپړېدو وروسته د سرپل د کرنې ریاست د مسلکي کارکوونکو له خوا به برخمن شوي بزګران د غنمو د تولید او پروسس په برخه کې وروزل شي.