راستانه شویو کډوالو ته د غنمو او نغدي مرستو د وېش په پار بادغیس ولایت ته د کرنې وزیر سفر
۱۳ سلواغه ۱۴۰۴ه.ش
۱۴ شَعبان المُعَظّم ۱۴۴۷ه.ق
د افغانستان اسلامي امارت د کرنې، اوبولګولو او مالدارۍ وزیر مولوي عطاءالله عمري د راستانه شوو کډوالو لپاره د غنمو او نغدي مرستو د وېش د بهیر د پیل په موخه، د یوه پلاوي په مشرۍ بادغیس ولایت ته سفر وکړ.
د دغه سفر په ترڅ کې، د کرنې، اوبولګولو او مالدارۍ وزیر مولوي عطاءالله عمري د یوې رسمي غونډې په ترڅ کې، چې د بادغیس ولایت والي ملا محمد حنیف حمزه، د والي مرستیال ملا غوثالدین افغان، د کرنې، اوبولګولو او مالدارۍ رییس او یو شمېر سیمهییزو چارواکو پکې ګډون درلود، د غنمو او نغدي مرستو د وېش لړۍ پیل کړه.
د کرنې، اوبولګولو او مالدارۍ وزیر په خپلو څرګندونو کې وویل، چې دغه مرستې د عاليقدر امیرالمؤمنین حفظهالله تعالی د ځانګړې لارښوونې له مخې، په ټول هېواد کې د اړتیا لرونکو کډوالو کورنیو د ملاتړ په موخه په پام کې نیول شوې دي او د وېش بهیر یې په منظم ډول په ټولو ولایتونو کې روان دی.
د کرنې وزیر وینا، هرې کډوالې کورنۍ ته پنځه بوجۍ غنم او پنځه زره افغانۍ نغدي مرسته ځانګړې شوې ده، تر څو هېواد ته له راستنېدو وروسته د هغوی د معیشتي ستونزو یوه برخه راکمه شي. نوموړي ټینګار وکړ، چې دغه بهیر په بشپړ شفافیت او نظم سره پلی کېږي.
همداراز د بادغیس د والي مرستیال د کرنې د وزیر او ورسره د مل پلاوي هرکلی وکړ او په دې ولایت کې یې راستانه شویو کډوالو ته د لا زیاتو اسانتیاوو د برابرولو په برخه کې د ځایي ادارې د هڅو یادونه وکړه.
ټاکل شوې ده، چې د دې بهیر په ترڅ کې به په بادغیس ولایت کې د ۱۲۰۰ راستانه شویو کډوالو کورنیو ته غنم او نغدي مرستې ووېشل شي.
