د کندهار پنجوایي کې زرګونو څارویو ته د چیچک او طاعون واکسین تطبیق شو
د کندهار د کرنې، اوبو لګولو او مالدارۍ ریاست په هڅو او د اروپايي ټولنې په مالي ملاتړ، د هالنډ کمیټې په تخنیکي همکارۍ، او د پنجوایي ولسوالۍ د کرنې او مالدارۍ مسؤولینو په تطبيق، ۱۳ زره او ۵۰۰ کوچنیو څارویو ته د چیچک او طاعون ناروغیو پر وړاندې واکسین تطبیق شو. د دې پروګرام موخه د څارویو د ناروغیو مخنیوی او د راتلونکو احتمالي وباو څخه د مالدارانو او څارویو ژغورل دي.
دا وقایوي واکسینونه له دې امله ورکول کېږي چې د ناروغیو خپرېدو څخه مخکې مخنیوي تدابیر ونیول شي. د چیچک او طاعون ناروغۍ د څارویو په منځ کې د پراخو مړینو لامل کېږي او کولی شي د مالدارانو اقتصاد ته جدي زیان واړوي. د دې واکسین له لارې د څارویو روغتیا خوندي کېږي او د مالدارانو کورنۍ د احتمالي اقتصادي زیانونو څخه ژغورل کېږي.
تر دې دمه ۸۲ زره دوزه واکسین چمتو شوي چې یوه میاشت وړاندې یې تطبیق په کندهار کې پیل شوی و. تر اوسه په سپین بولدک او خاکریز ولسوالیو کې واکسین چارې بشپړې شوې دي او په نورو ولسوالیو کې به هم دغه لړۍ دوام وکړي تر څو د ټولو اړمنو څارویو درملنه وشي.
