د کندهار نېش ولسوالی کې پر لسګونو کورنیو وزې او د څارویو خوراکي توکي ووېشل شول
۴ مرغومې ۱۴۰۴ه.ش
۴ رَجَب المُرَجَّب ۱۴۴۷ه.ق
د کندهار د کرنې، اوبو لګولو او مالدارۍ ریاست په هڅو، د ملګرو ملتونو د خوړو او کرنې ادارې (ایف.اې. ا) په مالي ملاتړ، د کندهار کډوالو مؤسسې (کې.آر.او) په تخنیکي همکارۍ او د مالدارۍ آمریت تر څارنې لاندې، د کندهار په نېش ولسوالی کې ۷۵ بېوزلو او اړمنو کورنیو ته ټولټال ۱۴۰ وزې، څارویو خوراکه او لبني توکي ووېشل شول.
د د کندهار د کرنې ریاست د مالدارۍ آمریت چارواکي وایي، دا مرسته د نېش ولسوالی ۷۵ کورنیو ته په عادلانه او شفاف ډول وېشل شوي دي، چې د مرستې له مخې، هرې کورنۍ ته دوه وزې، ۲۰۰ کیلو یا څلور پارسله د څارویو لپاره خوراکه او ترڅنګ یې د لبني توکو ۲۸ قلمه بشپړ او معیاري کیټ ورکړل شو.
د دې مرستې موخه د بېوزلو او اړمنو کورنیو اقتصادي ملاتړ، د هغوی د عاید سرچینو پیاوړتیا، د ژوند د اساسي اړتیاوو پوره کول او د بېوزلو کورنیو لاسنیوی کول دي.
د یادونې وړ ده، چې تر دې وړاندې هم د کندهار د کرنې ریاست په هڅو، د ملګرو ملتونو د خوړو او کرنې ادارې په مالي ملاتړ ، د کندهار په کښته میوند او لوړ میوند ولسوالیو کې هم ۷۵ بیوزلو کورنیو ته ورته مرسته ویشل شوې وه.
