د کندهار دوو ولسوالیو کې لسګونه بېوزله کورنیو ته د شاتو مچیو روزنیز توکي ووېشل شول

د کندهار د کرنې، اوبو لګولو او مالدارۍ ریاست د هڅو په پایله کې، د ملګرو ملتونو د خوړو او کرنې ادارې «اف. اې. او» په مالي ملاتړ او د بشري سرچینو پراختیا ادارې «ایچ. آر. ډي. ای» په تخنیکي همکارۍ د کندهار نېش او میانشین ولسوالیو ۱۵ بې وزله او اړمنو کورنیو ته د شاتو مچیو روزنې توکي ووېشل شول.
په دې مرسته کې اته کورنۍ د نېش او اووه کورنۍ د میانشین ولسوالۍ شاملې دي، چې هرې کورنۍ ته د شاتو مچیو د روزنې لپاره ۱۲ فریمونه، ۲ خالي فریمونه د تکثیر لپاره، رمبې، د مچیو ساتنې ځانګړې جامې، بوټونه، دست کشې، برش، د ملکې مچۍ نیولو بکس، د جذب لپاره ځانګړې غوړي، د تغذیې مواد، د نویو فریمونو یا ځالو جوړولو لپاره سیم، د ملکې پېژندلو مارکر، د عسل ایستلو لپاره ماشین، د مچیو د پاکټ ضد درمل (سلفر)، تغذیه کوونکی (فیډر) او د عسلو ازمېښتي ټیسټر ورکړل شوي دي.
سربېره پر دې، د یادو کورنیو غړو ته د دوو میاشتو لپاره د شاتو مچیو روزنې او ساتنې مسلکي روزنه هم ورکړل شوې، ترڅو دوی وکولای شي له دې مرستې ستره ګټه پورته کړي.
د یادونې وړ ده، چې وړاندې هم د کندهار د کرنې ریاست په هڅو، د ملګرو ملتونو د خوړو او کرنې ادارې په مالي ملاتړ او د«ایچ. آر. ډي. ای» مؤسسې په تخنیکي همکارۍ د نېش او میانشین ولسوالیو لسګونو اړمنو کورنیو ته د بڼ جوړونې وسایل، تخمونه، چرګان او نور اړین توکي وېشل شوې وه.