د کرنې وزارت کارکوونکو لپاره د ډاډورکونې غونډه دائره شوه
۷ /تله/۱۴۰۰ هـ.ق
۱۹/صفرالمظفر/ ۱۴۴۳ هـ.ق
د ا.ا.ا د کرنې وزارت، دکرنې او مالدارۍ مرستيال مولوي صدراعظم مالي او اداري مرستيال مولوی فضل الباري فضلي، ديوې غونډې په ترڅ کې دياد وزارت کارکوونکو ته د کار دبيا پيل ډاډ ورکړ.
دا غونډه د قرآن کریم د څو مبارکو آيتونو په تلاوت سره پيل شوه.
د ا.ا.ا دکرنې وزارت دکرنې او مالدارۍ مرستيال مولوي صدراعظم په دې غونډه کې، کار ته د بيا راستنېدو په پار دياد وزارت له کارکوونکو څخه دمننې ترڅنګ وويل: «ستاسو سره به زموږ چلند د ورورولۍ چلند وي او موږ هڅه کوو چې ستاسو له استعدادونو ګټه پورته شي.»
مولوي صدراعظم زياته کړه: «هلې ځلې کوو چې دکرنې، اوبولګولو او مالدارۍ وزارت بيا پر پښو ودرېږي او دکرنې، اوبولګولو او مالدارۍ په برخه کې چې هرڅوک ښې سلامشورې ولري له هغه نه ګټه پورته کوو.»
په همدې حال کې دکرنې وزارت مالي او اداري مرستيال مولوي فضل الباري فضلي وويل: «دکرنې وزارت د افغانستان په کچه يو خدماتي وزارت دی او دا وزارت دافغانستان خلکو پورې تړلې دي او سوداګرو او نورو برخو پورې نه دي تړلې. موږ هم مسؤل يو چې بزګرانو لپاره اسانتياوې برابرې کړو او دوی ته د فرصتونو زمينه برابره کړو. موږ مسؤل يو چې دکرنې، اوبولګولو، مالدارۍ او نورو برخو کې اسانتیاوي برابری کړو.»
فضلربي فضلي دکرنې وزارت کارکوونکو ته په خطاب کې وويل: «تاسو په خپلو اړوندو چارو کې تجربه لری او موږ او تاسو په ګډه بايد هرې برخې ته پاملرنه ولرو او په پوره اخلاص او صداقت سره خپل چوپړتياوې وړاندې کړو.»
د افغانستان اسلامي امارت مشرتابه له خوا دکرنې، اوبولګولو او مالدارۍ وزارت د رهبرۍ تر رسمي پېژندګلوی وروسته دا لومړی ورځ ده، چې دکرنې وزارت ټول کارکوونکي خپلو دندوته حاضرشوي دي.
ياده غونډه د کلامالله مجید د څو مبارکو ايتونو په تلاوت او دعا سره پای ته ورسېده.
