د کرنې وزارت ویاند په کابل بادامباغ کې د کرنیزو محصولاتو د نندارتون له غرفو څخه لیدنه وکړه
د بزګرمېلې او د کرنیزو او مالدارۍ محصولاتو د څلور دېرشم نندارتون په څلورمه ورځ، د کرنې، اوبو لګولو او مالدارۍ وزارت د اطلاعاتو او عامه پوهاوي رییس او ویاند، مولوي شیرمحمد حاتمي (نمبریک)، د کابل په بادامباغ کې د یاد نندارتون له غرفو څخه لیدنه وکړه.
ښاغلي حاتمي د دې لیدنې پر مهال د بزګرانو او مالدارانو تولیدات له نږدې وکتل او د کرنیزو او مالدارۍ محصولاتو د پلور بهیر یې وڅېړه. نوموړي له یو شمېر غرفهدارانو او ګډونوالو سره خبرې وکړې او د ورته نندارتونونو پر ارزښت یې ټینګار وکړ، چې د کورنیو تولیداتو د ملاتړ او بزګرانو لپاره د بازارموندنې د فرصتونو په رامنځته کولو کې مهم رول لري.
د نندارتون تنظیموونکي چارواکي وایي، دغه نندارتون د کورنیو محصولاتو د پېژندنې، د تولیدوونکو او سوداګرو ترمنځ د اړیکو د پیاوړتیا او د راکړې ورکړې د کچې د لوړولو لپاره مناسب فرصت برابر کړی دی.
د بزګرمېله او د کرنیزو او مالدارۍ محصولاتو نندارتون هر کال د کرنې، اوبو لګولو او مالدارۍ وزارت له لوري د بزګرانو د ملاتړ، د کورنیو تولیداتو د ترویج او د کرنې سکتور د ودې په موخه جوړېږي. د دې نندارتون څلور دېرشم پړاو هم د هېواد له بېلابېلو ولایتونو څخه د سلګونو غرفهدارانو په ګډون د کابل په بادامباغ کې ترسره شوی دی.
