د کرنې وزارت د پلان او پروګرامونو د همغږۍ لوی رییس د ملګرو ملتونو د اقلیمي بدلون او بدیل معیشت پروژې له مسئول سره وکتل
۱۳ زمری ۱۴۰۵ هـ.ش
۲۰ صَفَر المُظَفَّر ۱۴۴۸ هـ.ق
د کرنې، اوبو لګولو او مالدارۍ وزارت او په افغانستان کې د ملګرو ملتونو د پرمختیایي پروګرام «یوانډيپي» د اقلیمي بدلون او بدیل معیشت پروژې ترمنځ د همغږۍ او تخنیکي غونډه د کرنې وزارت د پلان او پروګرامونو د همغږۍ لوی رییس مولوي عبدالعلي عمري، په مشرۍ ترسره شوه.
په دې لیدنه کې د کرنې وزارت د پلان او پروګرامونو د همغږۍ لوی رییس د کرنې په برخه کې د «یوانډيپي» له همکاریو څخه مننه وکړه او د کرنې سکټور د پراختیا او د زیانمنونکو ټولنو د ملاتړ لپاره یې د ګډو همکاریو پر دوام او پراختیا ټینګار وکړ.
په دې غونډه کې په افغانستان کې د «یوانډيپي» د اقلیمي بدلون او بدیل معیشت پروژې مسئول، وحیدالله غرنی، وویل چې دغه پروژه به د ۲۰۲۵ څخه تر ۲۰۳۰ میلادي کلونو پورې د اقلیمي بدلون او بدیل معیشت د پروګرامونو د پلي کولو لپاره د کونړ او بدخشان ولایتونو ته ۹.۸ میلیونه امریکایي ډالر ځانګړي کړي. نوموړي زیاته کړه چې دغه پروګرامونه به د کرنې، اوبو لګولو او مالدارۍ وزارت، د کلیو د بیارغونې او پراختیا وزارت او د چاپېریال ساتنې ملي ادارې په همغږۍ او د ټاکل شویو لومړیتوبونو له مخې عملي شي.
د کرنې وزارت د پلان او پروګرامونو د همغږۍ لوی رییس هم ډاډ ورکړ چې دغه وزارت د خپلو نافذه پالیسیو او ستراتیژیو په چوکاټ کې د پراختیایي پروګرامونو د اغېزمن پلي کېدو او د اقلیمي بدلون د اغېزو د مخنیوي لپاره هر ډول همکارۍ ته چمتو دی.
نوموړي همدارنګه ټینګار وکړ چې د پروګرامونو د طرحې او پلان جوړونې پر مهال دې هغو محرومو لږو برخمنو ولایتونو ته هم ځانګړې پاملرنه وشي، چې تر اوسه د پراختیایي پروژو له ګټو لږ برخمن شوي دي.
