د کرنې وزارت د اراضۍ رياست لخوا شهيدانو او معلولينو چارو وزارت ته ځمکه ولېږدول شوه
۲۴ چنګاښ ۱۴۰۴ ه.ش
۱۹ مُحَرَّمُ الحَرام ۱۴۴۷ه.ق
د کرنې، اوبولګولو او مالدارۍ وزارت د اراضۍ ریاست کې جوړه شوې غونډه کې، چې د اراضۍ ریاست د ځمکو د انتقال او وېش رییس مولوي سید محمد سعيد او د شهیدانو او معلولينو چارو وزارت د ټولنیزو خدمتونو رییس مولوي ثناءالله فرقاني ګډون درلود، د اراضۍ رياست لخوا د شهیدانو او معلولينو چارو وزارت ته ځمکه ولېږدول شوه.
ياده ځمکه د شهیدانو او معلولينو چارو وزارت په وړانديز او د عالیقدر امیرالمؤمنین (حفظه الله تعالی) د حکم په اساس د اراضۍ رياست لخوا یاد وزارت ته سرپل ولايت مرکز میدانک بغاوي سيمه کې په ۳۰۰ جريبه ځمکه باندې د شهيدانو د ښارګوټي د جوړولو په موخه ولېږدول شوه.
د یادې ځمکې لېږد ټړون د کرنې وزارت د اراضۍ ریاست د ځمکو د انتقال او وېش رييس مولوي سيد محمد سعید او د شهیدانو او معلولينو چارو وزارت د ټولنیزو خدمتونو رییس مولوي ثناءالله فرقاني ترمنځ لاسلیک شوه.
