د پکتیکا دکرنې رییس د هالنډ کمېټې چارواکو سره وکتل
۱۲ غویی ۱۴۰۵ه.ش
۱۵ ذُو ٱلْقَعْدَةِ ۱۴۴۷ه.ق
د پکتیکا ولایت د کرنې، اوبو لګولو او مالدارۍ رییس مولوی لعل محمد ګوهر، د هالنډ کمېټې له چارواکو سره د همکارۍ د پراختیا په موخه ناسته ترسره کړه.
په دې لیدنه کې د هالنډ کمېټې مسوول د خپلې څلور کلنې پروژې په اړه هر اړخیز معلومات وړاندې کړل او په ځانګړې توګه یې د مالدارۍ په برخه کې د خپلو روانو او راتلونکو فعالیتونو په اړه رڼا واچوله. نوموړي زیاته کړه، چې د یادې پروژې په چوکاټ کې ۱۳ حیواني کلینیکونه پلان شوي، چې ټاکل شوې ده په ۲۰۲۶ کال کې به ۵ کلینیکونه په لرو پرتو ولسوالیو کې جوړ او ګټې اخیستنې ته وسپارل شي.همدارنګه، د موسسې مسؤل په یو شمېر ولسوالیو کې د پروژو د عملي کار د پیل خبر هم شریک کړ.
په پای کې، د پکتیکا ولایت کرنې، اوبو لګولو او مالدارۍ رییس مولوی لعل محمد ګوهر د هالنډ کمېټې د فعالیتونو ستاینه وکړه او ډاډ یې څرګند کړ چې ریاست به له یادې کمېټې سره په ټولو برخو کې هر ډول لازمې همکارۍ ته چمتو وي.
