د هېواد په څه باندې ۲۰ ولایتونو کې سږکال د اوبولګولو ۱۲۱ شبکې جوړې شوي دي

۳۰ تله ۱۳۹۹
دکرنې، اوبولګولو او مالدارۍ وزارت د روان مالي کال په ترڅ کې د هېواد په ۲۳ ولایتونو کې د اوبولګولو ۱۲۱ شبکې جوړې کړي دي.
د اوبولګولو یادې شبکې، د غور، میدان وردګ، پکتیا، دایکندي، بغلان، پنجشېر، بادغیس، کونړ، زابل، تخار، ننګرهار، هلمند، کابل، غزني، پکتیکا، خوست، فراه، ارزګان، کندهار، هرات، بلخ، لوګر او پروان په ولایتونو کې جوړ شوي دي.
دغه راز د روان مالي کال په ترڅ کې د کندهار، تخار، بدخشان، ننګرهار او جوزجان په ولایتونو کې د اوبولګولو ۴۳۵ فرعي دویم او درېیمې درجې کانالونه احیا او بیارغول شوي دي.
په ورته وخت کې د دایکندي، پکتیا، بلخ، سمنګان، بغلان، نورستان، ننګرهار، کونړ، لغمان، هرات، غور، خوست، پکتیکا، ارزګان، کندهار او بادغیس په ولایتونو کې د ۱۲۱ واړه آبرېزو د جوړولو او بیا رغولو چارې سږکال پیل شوي دي، چې د مالي کال تر پایه یې رغنیزې چارې بشپړ او ګټې اخیستنې ته سپارل کیږي.