د هلمند واشېر کې یوشمېر مالدارانو سره د وړیو پرېکولو د ماشینونو مرسته وشوه
۱۸چنګاښ ۱۴۰۳ه.ش
۲ مُحَرَّمُ الحَرام ۱۴۴۶ه.ق
دهلمند ولایت د کرنې، اوبولګولو او مالدارۍ ریاست اړوند د مالدارۍ او حیواني روغتیا آمریت لخوا د واشېر ولسوالی مالدارانو سره د وړیو پرېکولو د ٣ پایو ماشیانو مرسته وشوه.
دغه ماشینونه په یوه ساعت کې له ٤٠ څخه تر ٥٠ راسه پسونو پورې د وړیو د پرېکولو وړتیا لري، چې د ټولې ولسوالی مالداران به په وړیا ډول ګټه ورڅخه اخلي.
دیادو ماشینانو د ویشنې پر مهال د مالدارۍ او حیواني روغتیا آمر حافظ هدایت الله هدایت وویل :«داچې تر دې وړاندې د واشېر ولسوالی مالدارانو په محلي ډول د خپلو مالونو څخه وړۍ پرې کولې چې له یوې خوا به یې وخت ضایع کېدل او له بلې خوا به په غیر معیاري ډول دغه چارې سرته رسیدلې، له دې وروسته به په کم وخت کې په مسلکي ډول نوموړي مالداران د خپلو مالونو وړۍ د یادو ماشیانو پر مټ پرې کوي او بیا به یادې وړۍ بازار ته د پلور لپاره وړاندې کوي.»
نوموړي همدارنګه وویل، چې له دغو ماشینانو څخه به په منظم ډول په دسته جمعي توګه د هر کلي مالداران ګټه اخلي تر څو په دې برخه کې یې پرتې ستونزې حل شي.
ښاغلي هدایت همدارنګه وویل، چې دکرنې ریاست په غوښتنه او د افغانانو لپاره د هالنډ کمېټې په مالي همکارۍ دغه مرستې چمتو شوي دي، چې هڅه به وکړي ترڅو نورو ولسوالیو ته هم دغه ډول ماشینونه ووېشي.
دیادولو وړ ده، چې تر دې وړاندې هم هلمند کې د مالدارۍ سکتور د ودې او پراختیا په برخه کې زرګونه مالدارنو سره په بېلا بېلو برخو کې مرستې شوي دي.
