د ننګرهار کانال ریاست: په درېیم فارم کې د زیتونو ۳۵۰ جریبه نوي بڼونه جوړېږي
۹ لېندۍ ۱۴۰۱ه.ش
۶ جمادي اﻷول ۱۴۴۴ ه.ق
د ننګرهار دکانال ریاست چارواکي وایي، چې د یاد ریاست اړوند د درېیم فارم په ۳۵۰ جریبه ځمکه کې د زیتونو بڼونو جوړولو چارې پیل شوي دي.
ياد زیتون بڼونه د انقلابي شرایطو او بېلابېلو ناخوالو له امله تخریب شوي و، چې ددې ناخوالو په پایله کې دا ځمکه په شاړې او وچې دښتې بدل شوي دي، چې اوس پرې د زیتونو نوي بڼونه جوړېږي.
د ننګرهارکانال رییس مولوي غلام الرحمن کظیم وویل: «په دې ۳۵۰ جریبه ځمکه کې به د زیتونو بڼونه جوړ شي ټول زيتون بوټي خپله د ننګرهار رياست په شته قوريو کې روزل شوي دي، چې ورسره به ددې کانال د زیتونو د حاصلاتو کچه لوړ شي.»
باید وویل شي، چې د ننګرهارکانال ادارې د تاسیس سره سم په ۳۱۰۰ هکتاره ځمکه باندې زیتون کرل شوي وو خو اوس یې ۱۷۲۰ هکتاره ځمکه باندې زیتون پاتې دي او کابو ۱۳۸۰ هکتاره ځمکې باندې جوړ زیتون بڼونه د جګړو او بېلا بېلو ناخوالو له امله ویجاړ شوي دي.
د کانال له پروژې نه ترلاسه کېدونکي زیتون نه د اچار جوړولو او تېلو په خاطر کار اخیستل کېږي او اوس مهال یې د اچار جوړولو چارې زیتونو فابرېکې کې روانې دي.
