د ننګرهار کامه کې ۹۱ جریبه ځمکه د ازادې داوطلبۍ په ترڅ کې په اجاره ورکړل شوه.
۸ چنګاښ ۱۴۰۴ ه.ش
۳ مُحَرَّمُ الحَرام ۱۴۴۷ه.ق
د ننګرهار د کرنې، اوبو لګولو او مالدارۍ ریاست د اجارو مدیریت له لورې د کامي ولسوالی صفدر بازدید خېلو کلي کې ۹۱ جریبه او څلور بسوي ځمکه دننګرهار د کرنې رییس او ګډ پلاوی په حضور کې په اجاره ورکړل شوه.
په داوطلبۍ کې د اتو کرنیزو او مالدارۍ شرکتونو مالکینو ګډون کړي وو، چې د محمد امین طلحه کرنیز او مالدارۍ شرکت د مسؤلینو نرخ تر نورو لوړ او د ګډ پلاوي له لورې ګټونکي اعلان شو.
د محمد امین طلحه کرنیز او مالدارۍ شرکت مسؤلینو یاده ځمکه د کال په ۲۰ زره افغانۍ د بڼوالۍ او نورو کرنیزو چارو ترسره کولو په موخه په اجاره ونیولو.
د ننګرهار د کرنې، اوبو لګولو او مالدارۍ رییس مولوي محمد ولي محسن ګټوونکي شرکت ته د کرنې، اوبو لګولو او مالدارۍ وزارت او اجارو د قانون مطابق د اصولي اجرااتو ترسره کولو سپارښتنه وکړه.
