د ننګرهار وادي کرنیز امارتي شرکت کې د کرنیزې پرمختیا صندوق پرانیستغونډه وشوه
۲۷ مرغومې ۱۴۰۳ھ.ش
۱۶ رَجَب المُرَجَّب ۱۴۴۶ه.ق
د ننګرهار وادي کرنیز امارتي شرکت مسوولین وایي، د کرنیز سکتور د پیاوړتیا او بزګرانو د مالي ملاتړ په موخه تېره ورځ د دغه شرکت د غونډو په تالار کې د کرنیزې پرمختیا صندوق اې ډي ایف پرانیست غونډه وشوه.
په غونډه کې د ننګرهار وادي کرنیز امارتي شرکت مشرتابه، د فارمونو امرینو، د کرنې مدیرانو، قراردادي شرکتونو استازواو مخورو ګډون کړی و.
د ننګرهار وادي کرنیز امارتي شرکت عمومي رئیس، سید محمد نعیم "محمدي"، د صندوق پرانیست غونډې ته په وینا کې وویل چې په هېواد کې د جګړو او ستونزو له امله د کرنې په برخه کې د پام وړ پرمختګ نه دی شوی، خو اوس غوره فرصت رامنځته شوی دی چې باید ترې په کرنیز سکتور کې ګټه واخیستل شي.
د یاد صندوق له لارې به د اسلامي مالي چوپړتیاوو له مخې بزګرانو او قراردادي شرکتونو ته پورونه ورکړل شي، ترڅو د اړتیا وړ کرنیز توکي او ماشینونه ترلاسه کړي. ښاغلي محمدي زیاته کړه چې د کرنې د پرمختیا صندوق موخې د کروندګرو، بڼوالو او بزګرانو لپاره ګټورې دي او له ګډونوالو یې وغوښتل چې د اسلامي مالي چوپړتیاوو په وړاندې کولو کې لا زیاته اغېزمنتیا رامنځته کړي.
د کرنیزو شرکتونو په استازولۍ حاجي اسلام الدین وویل چې د کرنیزې پرمختیا صندوق وړاندې یو شمېر سخت شرایط لرل چې له امله یې ډېری شرکتونو ګټه نه شوه ترې اخیستلای، خو اوس د صندوق شرایط راکم شوي دي. هغه ژمنه وکړه چې د توافقاتو پر بنسټ به له صندوق سره همکاري وکړي.
د کرنیزې پرمختیا صندوق د ختیځ زون مسؤل، ګل حبیب "همت"، په وینا کې وویل چې دغه صندوق یوه دولتي او غیر بانکي اداره ده چې د عالي شورا په مشرۍ خپلې چارې ترسره کوي. نوموړي زیاته کړه چې د کرنیزو اسانتیاوو برابرول، د اقتصادي پرمختګ لپاره کار کول او د کرنیزې سوداګرۍ او بزګرانو مالي ملاتړ د دې صندوق اساسي موخې دي.
د ننګرهار وادي کرنیز امارتي شرکت د ارشاد او دعوت لوی مدیر مولوي روح الله "روحاني" د اسلامي شریعت له نظره د بیع مرابحه په تړاو ګډونوالو ته تفصیلي معلومات ورکړل.
ګډونوالو باور درلود چې د کرنیزې پرمختیا صندوق د فعالیت له پیل سره به د کروندګرو او کرنیزو شرکتونو ستونزې تر یو حده حل شي.
