د ننګرهار د شپږو ولسوالیو یوشمېر مېرمنو لپاره د ۲۳۰ شنوخونو د جوړولو تړونونه لاسلیک شول

۲۵ وږی ۱۳۹۸
د کرنې، اوبولګولو او مالدارۍ وزیر د خپل ولایتي سفرونو په لړ کې داځل ننګرهار ولایت ته ولاړ ترڅو په دې ولایت کې د یاد وزارت یو شمېر بشپړ شوي پروژې ګټې اخیستنې ته وسپاري د یوشمېر نورو پروژو د جوړولو د بنسټ ډبره کېږدي او په دې ولایت کې د کرنې وزارت د یوشمېر نورو برنامو پرانسته وکړي.
په لومړي ګام کې د ننګرهار والي شاه محمود میاخیل په شتون کې د کرنې، اوبولګولو او مالدارۍ وزیر نصیر احمد درانی او د ننګرهار قومي مشرانو، پراختیا يي شوراګانو او بزګرانو ترمنځ ددې ولایت د شپږو ولسوالیو یوشمېر مېرمنو لپاره د ۲۳۰ شنوخونو د جوړولو تړونونه لاسلیک شول.
دغه شنې خونې د کروندګرو مېرمنو د عوایدو زیاتولو په پار د کرنې وزارت له خوا د ننګرهار ولایت د خوګیاڼو، شیرزاد، کوټ، رودات، چپرهار او اچین ولسوالیو یوشمېر مېرمنو لپاره جوړیږي.
د دغو شنوخونو د جوړولو په پرانست غونډه کې دکرنې وزیر نصیر احمد درانی وویل: «تر راتلونکو دوه یا درې میاشتو پورې به ددغو شنوخونو د جوړلو چارې بشپړ او ګټې اخیستنې ته به وسپارل شي.»
د دغو جوړېدونکو شنوخونو د هر یوه لګښت کابو ۸۵ زره افغانۍ ده. د ۲۳۰ شنوخونو دجوړولو ټولیز لګښت ۲۰ میلیونه افغانۍ کیږي.
ددغو شنوخونو په جوړولو کې د کرنې د ودې او کلیوالي پراختیا پورژه «CBARD»، د کرنې وزارت او سیمه ییزې شوراګانې مهم رول لري.