د ملي بیرغ ورځ مو مبارک!
د زمري اوومه د بیرغ ملي ورځې په مناسبت ټولو ګرانو هېوادوالو ته د زړه له کومې مبارکي وایم.
دا د ویاړ ډکه ورځ، د هېواد اقتدار او د افغانستان د خلکو د پیوستون د نښې په صفت، د افغانستان خلکو ته فوقالعاده اهمیت لري؛ ځکه دا درې رنګه بیرغ د افغانستان خلکو لپاره ستر چتر دی او د ملتونو تاریخ د همدې ملي هویت، ملي ارزښتونو او ملي بیرغ په لوړوالي کې ځلیږي او دا نړۍ ته زموږ د پېژندګلوۍ ملي نښان دی.
چېرته چې زموږ درې رنګه بیرغ رپېږي، خلک آرام او خوښ دي. د ملي بیرغ تر سیورې لاندې د هېواد ملي وقار او پراختیا شونې ده. ددې بیرغ تر سیورې لاندې واحد ملت یو، واحد هېواد لرو او زموږ د ځواکمنتیا استازیتوب کوي. شته تفاوتونو ته په کتو د افغانستان ټول خلک ددې بیرغ تر چتر لاندې په یوه ملت بدلېږي او په همدې موخه ټول هڅه کوي، چې ملي بیرغ هسکه او رپانده وساتي.
ژوندۍ دې وي افغانستان، هسکه او رپانده د وې د هېواد درې رنګه بیرغ!
دکرنې، اوبولګولو او مالدارۍ وزیر
ډاکټر انوارالحق احدي
