د لوګر ولایت د غصب مخنیوی او د غصب شویو ځمکو د بېرته راګرځولو تخنیکي پلاوی اوونیزه غونډه
۲۶ مرغومې ۱۴۰۱ه.ش
۲۳ جُمادیَ الثّاني ۱۴۴۴ ه.ق
د لوګر ولایت د غصب مخنیوی او د غصب شویو ځمکو د بېرته راګرځولو تخنیکي پلاوی خپله اوونیزه غونډه د دغې کمیټې د رییس په مشرۍ جوړه کړه.
دغه غونډه چې د لوګر ولایت د کرنې، اوبولګولو او مالدارۍ ریاست په مقام کې جوړه شوې وه په کې پر بېلابېلو موضوعاتو خبرې اترې وشوې.
په دې غونډه کې دغه راز د عدلیې وزارت له خوا د مسترد شویو دوسیو په هکله هم خبرې وشوې او د لوګر ولایت دمرکز اړوند هوني سفلا د سیمې د اسناو څېړلو په پار، چې په غصب شوې ځمکه کې ودانۍ جوړې شوي دي د لوګر د حج او اوقافو رییس مولوی فضل الکریم په مشرۍ پلاوی وټاکل شو، چې مشخصات یې په جدول کې درج او د پاتې اجراآتو لپاره بیاځلې مرکزي کمېسیون ته ولېږل شي.
دغه راز په دې غونډه کې د هغو اداراتو پر غصب شویو ځمکو چې د ځینو کړیو له خوا غصب شوي دي هم خبرې وشوې او وویل شو، چې د اداراتو چارواکي دې، ټاکل شوې پلاوی ته په مکتوبي توګه معلومات وړاندې کړي ترڅو د ځمکې نوعیت او محدوده څرګند کړي.
په همدې حال کې په دې غونډه کې د راتلونکې ۱۴۰۲ ام کال د کاري پلان په هکله هم هر اړخیزې خبرې اترې وشوې.
