د خوست ځاځي میدان کې یوشمېر بزګرانو ته شنې خونې جوړېږي
د خوست دکرنې، اوبولګولو او مالدارۍ ریاست چارواکي وایي، د ملګرو ملتونو د پراختیایي ادارې په همکارۍ ددې ولایت د ځاځي میدان په ولسوالی کې د موسمي سبو د کرکیلي دودولو او د بزګرانو د ملاتړ په پار یوشمېر بزګرانو ته شنې خونې جوړېږي.
د خوست دکرنې ریاست چارواکي وایي، چې دغه شنې خونې د «اې.ډي.اف» مؤسسې په تخنیکي همکارۍ د خوست ولایت د ځاځي میدان په ولسوالی کې جوړېږي، چې موخه یې د سبو او مېوو تولید زیاتوالی ښودل شوی دی.
یاد پروګرام د کروندګرو د عوایدو لوړولو او د خوست ولایت د کرنیزو خدمتونو د پراختیا په برخه کې یو مهم ګام ګڼل کېږي. دغه شنې خونې په ټولو موسمونو کې سابه او ترکاریو ته دخوست د خلکو د لاس رسي، د موسمي تولیداتو زیاتوالی او په بازارونو کې د کرنیزو حاصلاتو د ډېرښت په پار په دې ولایت کې جوړېږي.
