د بڼوالۍ ځنځیري ارزښت د پراختیا پروژه په کابل کې د پیازو ۹۷ زېرمتونونه جوړ کړي دي
۲۷ لړم ۱۳۹۹
د کرنې، اوبولګولو او مالدارۍ وزارت اړوند د بڼوالۍ ځنځیري ارزښت د پراختیا پروژه، د کابل په ولایت کې د پیازو ۹۷ زېرمتونونه جوړ کړي دي.
د پیازو دغه زېرمتونونه د کابل ولایت د ده سبز، خاک جبار، بګرامي او موسهي ولسوالیو او د کابل ښار په ځینو سیمو کې جوړ شوي دي. ددغو زېرمتونونو د جوړولو چارې د کرنیزو محصولاتو مدیریت د پروژې په اډانه کې پیل او د بڼوالۍ ځنځیري ارزښت د پراختیا پروژې په مدیریت کابو میاشت مخکې بشپړ او ګتې اخیستنې ته سپارل شوي دي.
دغه زېرمتونونه د بزګرانو په ۲۰ سلنې ونډې سره د ۴۷میلیونه او ۷۵۶زره او ۷۸۶ افغانیو په لګښت جوړ شوي دي.
دغه زېرمتونونه هر یوه یې ۱۲ مټریک ټنه وړتیا لري او د کابل بزګران کولای شي، چې د کال یوزر او ۱۶۴ مټریک ټنه پیاز په کې زېرمه کړي.
تېرکال د کابل په یوزر او ۶۳ هکټاره ځمکه کې پیاز کرل شوې وه او د تولید کچه یې ۲۱ زره او ۲۶۰ مټریک ټنه وه.
