د بڼوالۍ ځنځیري ارزښت د پراختیا پروژه، د اوبو ۴۵ زېرمې جوړوي
۲۳ مرغومې ۱۳۹۹
د کرنې، اوبولګولو او مالدارۍ وزارت په پام کې لري، چې د ۱۴۰۰ ام مالي کال په ترڅ کې د بڼوالۍ ځنځیري ارزښت د پراختیا پروژې له لارې د هېواد په نهو ولایتونو کې د اوبو ۴۵ زېرمې جوړې کړي.
د کرنې وزارت د بڼوالۍ ځنځیري ارزښت د پراختیا پروژه«HVCDSP»، چې د اسیایي پراختیایي بانک «ADB» له خوا تمویلیږي، ددغو زېرمو د جوړولو چارې پرمخ وړي. د یادې پروژې چارواکي وایي، چې د اوبو یادې زېرمې د غزني، پکتیا، پکتیکا، وردګ، لوګر، خوست، لغمان، کونړ او ننګرهار په ولایتونو کې جوړیږي. د یادو چارواکو په خبره د هر ولایت لپاره د اوبو پنځه زېرمې په پام کې نیول شوي دي.
دغه زېرمې به هر یو یې د ۴۰۰تر ۸۰۰ متر مکعب اوبو د ساتنې وړتیا ولري. له دغو زېرمو څخه په استفادې سره د پراخو کرنیزو ځمکو د خړوبولو اوبه برابریږي.
