د بلخ کشنده ولسوالی کې له کډوالۍ راستنو شویو یوشمېر کورنیو سره نغدې مرسته وشوه
۲۰ سلواغه ۱۴۰۴ه.ش
۲۱ شَعبان المُعَظّم ۱۴۴۷ه.ق
د بلخ دکرنې، اوبولګولو او مالدارۍ ریاست په همغږۍ د «ډبلیواچاچ» مؤسسې په همکارۍ ددې ولایت د کشنده په ولسوالی کې له کډوالۍ راستنوشویو یوشمېر کورنیو سره د نغدې پیسې مرسته وشوه.
یاده مرسته په څلورو پړاوونو کې د ۳۰۰ تنو اړمنو کسانو لپاره تطبیق شوه، چې په دوهم پړاو کې هر اړمن کس ته ۲۶۳۰ افغانۍ ووېشل شوې. همدارنګه د ۹۳ تنو بېرته راستنو شوو کډوالو لپاره، چې له خپلو کورنیو سره یوځای د ایران له هېواده ایستل شوي وو، نغدي مرسته په درې پړاوونو کې په پام کې نیول شوې وه، چې په دوهم پړاو کې هر کس ته ۹۹۶۵ افغانۍ ورکړل شوې.
د یادونې وړ ده چې د مرستو د وېش بهیر د کشنده ولسوالی د کرنیزو خدمتونو د عمومي مدیر ملا سمیعالحق عمار او د غلو او حبوباتو د ترویج مدیر حبیبالله حبیبي په حضور کې، په شفاف او منظم ډول ترسره شو.
دغه پروګرام د اړمنو کسانو او بېرته راستنو شوو کډوالو په ملاتړ کې مهم رول لوبوي او د اړمنو کسانو د معیشتي وضعیت په ښه کېدو کې یې اغېزمنه مرسته کړې ده.
