د افغانستان د کرنې وزیر د ۱۳ کسیز پلاوي په مشرۍ بلاروس ته سفر وکړ
۲۶ زمری ۱۴۰۵ هـ.ش
۳ رَبِیعُ الْأَوَّل ۱۴۴۸ هـ.ق
د افغانستان اسلامي امارت د کرنې، اوبولګولو او مالدارۍ وزیر مولوي عطاءالله عمري د یوه ۱۳ کسیز پلاوي په مشرۍ، د افغانستان او بلاروس ترمنځ د اقتصادي او سوداګریزو همکاریو د ګډ کمېسیون په دویمه غونډه کې د ګډون په موخه، د بلاروس د رسمي بلنې پر اساس دغه هېواد ته سفر وکړ.
په دې پلاوي کې د صنعت او سوداګرۍ وزارت مرستیال، د کرنې، اوبولګولو او مالدارۍ، ترانسپورټ او ملکي هوايي چلند، مالیې، بهرنیو چارو او سوداګرۍ وزارتونو استازي، همدارنګه د امارتي شرکتونو او د ریاستالوزراء اقتصادي معاونیت استازي شامل دي.
ټاکل شوې ده، چې افغان پلاوی به د دغه سفر په ترڅ کې د بلاروس له چارواکو سره د ګډو اقتصادي او سوداګریزو همکاریو د پراختیا، د اقتصادي اړیکو د پیاوړتیا او د دواړو هېوادونو ترمنځ د همکاریو د زمینې د برابرولو په اړه خبرې اترې وکړي.
د افغانستان او بلاروس ترمنځ د اقتصادي او سوداګریزو همکاریو د ګډ کمېسیون دا سفر او غونډه به پنځه ورځې دوام وکړي.
