دکرنې وزارت د ځمکو چارو رییس د دغه ریاست د نقشو د چاپ له څانګې څخه ليدنه وکړه
د کرنې، اوبولګولو او مالدارۍ وزارت د اراضۍ لوی رییس مولوي محمود مظلوم د دغه ریاست د مېټاډېټا رياست د نقشو د چاپ له څانګې څخه په داسې حال کې ليدنه و کړه، چې د اراضۍ ریاست د استملاک او بيا مېشتېدنې عمومي رییس مولوي عبدالعلي عمري، د مېټاډېټا رییس انجنیر محمد شفيع ځاځی، د قراردادونو د تنفيذ رییس مولوي محمود حميدي او د اراضۍ لوی رياست یو شمېر چارواکو او کارکوونکو یې ملتيا کوله.
په پیل کې د مېټاډېټا رییس انجنیر محمد شفيع ځاځی او د نقشو د چاپ څانګې آمر محمد آصف شهابي په خپل وار د دغه څانګې د کارونو په اړه په پوره توګه معلومات وړاندې کړل او ویې ویل: «د افغانستان اسلامي امارت په ځانګړې توګه د کرنې وزارت د اراضۍ ریاست د هغو نقشو د واردولو څخه مخنيوی وکړي کومې چې له هېواد څخه بهر چاپېږي ځکه چې د اراضۍ ریاست په ياده څانګه کې کومې نقشې چې نورو امارتي ادارو او خلکو ته د هغو د رسمي غوښتنې پر بنسټ چمتو کېږي په دقيقه توګه او په لوړ معيار دي.»
ورپسې د اراضۍ لوی رییس د دغه څانګې د مسؤلینو او کارمندانو له زیار او کوښښ څخه مننه وکړه او هغو ته يې په خپلو دندو کې لازمې لارښوونې هم وکړې.
د يادونې ده، چې په دغه څانګه کې د هېواد په کچه په بېلابېلو سايزونو کې مختلف النوع نقشې، بروشرونه او داسې نور تبليغاتي اقلام په معیاري توګه چاپېږي.
