جوزجان کې یوزر او ۶۲۰ تنو ته د کار زمینه برابرېږي

۱۰ تله ۱۴۰۰ هـ.ش
۲۵/صفر/۱۴۴۳ هـ.ق
د ا.ا.ا د جوزجان د کرنې، اوبولګولو او مالدارۍ ریاست چارواکي وایي، چې د ملګرو ملتونو د خوړو او کرنې ادارې «FAO» په همکارۍ د شبرغان د ځنګل باغ د بیارغونې په موخه ددې ولایت یوزر او ۶۲۰ کسان ګمارل کېږي.
د جوزجان ولایت د کرنې، اوبولګولو، مالدارۍ، عشر او زکات مسوول، قاري عبیدالله او د ملګرو ملتونو د خوړو او کرنې ادارې «FAO» مسوول د خپلو کاري برنامو او فعالیتونو په هکله خبرې وکړې او د شبرغان له ځنګل بڼ څخه لیدنه وکړه.
په دې لیدنه کې د ملګرو ملتونو د خوړو او کرنې ادارې مسؤل د یوزر او ۶۲۰ کارګرانو دګمارنې په هکله وویل، چې له دې ډلې ۵۰۰ یې د منګجک په ولسوالۍ کې، ۵۰۰ د مردیان په ولسوالۍ کې، ۵۰۰ د شبرغان او ۶۲۰ نور یې د شبرغان ځنګل باغ او د یادو ولسوالیو د قوریو او ویالو پاکولو کې ګمارل کېږي.
په همدې حال کې، د «ORD» له لارې هم د شوبي افغانیه، یکه‌باغ، صوفی‌قلعه، افغان‌تپه، سالمزان او شبرغان ځنګل باغ کې ۲۷۰ کسانو ته د کار زمینه برابرېږي.
 د جوزجان ولایت د کرنې مسوول د یادې موسسې له کارونو او فعالیتونو څخه د مننې ترڅنګ د شبرغان په ځنګل باغ کې د جدي او لا ډېرو کارونو د ترسره کولو غوښتنه وکړه.