اروزګان کې د اوبولګولو د یوې پروژې چارې پیل شوې
٢۳ تله ۱۴۰۲ه.ش
۱ ربیعالثاني ۱۴۴۴ ه.ق
د اروزګان د کرنې، اوبولګولو او مالدارۍ ریاست ددې ولایت د مهرآباد په سیمه کې د اوبولګولو د یوې پروژې رغنیزې چارې پیل کړي دي.
په دې اړه جوړه شوې غونډه کې د اروزګان دکرنې رییس الحاج مولوی عبدالصمد مقبول، د اقتصاد رییس مولوی مولاداد حسن، د ولایت مقام استازی او یوشمېر سیمه ییزو چارواکو شتون درلود.
د اروزګان دکرنې رییس الحاج مولوی عبدالصمد مقبول وویل، چې دغه سربند د کرنې وزارت له بودیجې څخه د ۴ میلیونه افغانیو په لګښت د دوو میاشتو په موده کې رغول کېږي.
د اروزګان دکرنې رییس وویل، چې ددې پروژې په بشپړېدو سره به سلګونه جریبه کرنیزه ځمکه خړوبه او زرګونو خلکوته به د کار زمینه هم برابره شي.
په همدې حال کې د سیمې اوسیدونکو د یاد سربند په جوړیدو خوښي وښوده او د اروزګان د کرنې، اوبولګولو او مالدارۍ ریاست او پروژی له مسولینو څخه مننه وکړه.
ددې پروژې د پلي کولو موخه د بزګرانو کروندو ته پر وخت او کافي ابه رسول، د ځمکې لاندې اوبو پیاوړتیا او په ټوله کې د اوبو مدیریت دی.
