تر دې وروسته د دایکندي مڼې نه خوساکیږي او په ښه بیه خرڅیږي؛

د دایکندي په ولایت کې د مڼو ۱۸ صفر انرژۍ سړې خونې جوړ شول

20 ساعتونه 18 دقیقې مخکې

د دایکندي په ولایت کې د کرنیزو محصولاتو مدیریت د پروژې په اډانه کې د مڼو ساتنې په پار د ۲۱ صفر انرژۍ سړوخونو له ډلې تر دې دمه د ۱۸ سړوخونو رغنیزې چارې بشپړ او د درې نورو هغو چارې نږدې ۷۰ سلنه بشپړ شوي دي.
ددغو سړوخونو د جوړولو ټولیز لګښت د بڼوالو له ونډې پرته نږدې ۵۰ میلیونه افغانۍ ده، چې د حکومت له خوا پرې شوې ده.
تر بادامو وروسته، مڼه د دایکندي ولایت د بڼوالۍ تر ټولو ډېر محصول دی، چې په پراخه کچه ددې ولایت په ټولو ۱۰ ولسوالیو کې تولیدیږي. په دایکندي کې د مڼې څلور زره او ۹۰۰ جریبه بڼونه دي، چې روان کال له دغو بڼونو ۳۵ زره ټنه مڼې راټول شوي دي. د دایکندي په ولایت کې نږدې ۲۰ ډوله مڼې تولیدیږي، چې تر ټولو مشهور هغه یې د دخترشاه (د پادشاه لور) مڼې دي. د دختر شاه مڼه له تولید وروسته کابل او هرات ولایتونو ته صادریږي، چې غوره کیفیت او ځانګړی خوند لرونکې دي.
د دایکندي د کرنې ریاست د چارواکو په خبره تر دې وړاندې د دایکندي ولایت د مڼو د تولیداتو ډېره برخه یا په ټیټه بیه خرڅېدل او یا خوساکېدل، خو ددغو سړوخونو په جوړېدو سره به تولیدوونکي وهڅیږي، چې لا ډېرې مڼې تولید کړي.