لغمان کې د لیمو بڼونه او حاصلات ډېر شوي

۵ لیندۍ ۱۳۹۹
د لغمان ولایت د کرنې، اوبولګولو او مالدارۍ ریاست وایي چې، په دې وروستیو کلونو کې په دې ولایت کې د لیمو بڼونه او حاصلات ډېر شوې او مخ پر وده روانه ده.
د لغمان د کرنې رییس محمدجمیل خوشحال وایي «د لغمان خاوره اوبه او هوا د لیمو ونو پالنې او روزنې ته مناسبه ده او په دې ولایت کې کال تر بله د لیمو بڼونه زیاتیږي.» د ښاغلی خوشحال په خبره د لغمان ولایت په ۳۷ هکټاره ځمکه کې د لیمو بڼونه جوړ شوي دي، چې سږني حاصلات یې ۱۸۴ مټریک ټنو ته رسیږي.
د لغمان په ولایت کې د سټروسو بڼونه شته او خلک په خپلو کورونو او کروندو کې د سټروسو ونې اېښي دي او يا د سټروسو بڼونه یې جوړ کړي دي، خو په تېرو څو کلونو کې د کرنې وزارت له خوا په دې ولایت کې د سټروسو یوشمېر معیاري بڼونه هم جوړ شوي دي.