پکتیا کې د پیازو او کچالو ۸۱ زېرمتونونه ګټې اخیستنې ته وسپارل شول

۲ لیندۍ ۱۳۹۹
د کرنې، اوبولګولو او مالدارۍ وزارت د کرنیزو محصولاتو مدیریت د طرحې په اډانه کې او د دې وزارت د بڼوالۍ ځنځیري ارزښت د پراختیا پروژې له لارې، د پکتیا په ولایت کې د پیازو او کچالو ۸۱ زېرمتونونه جوړ او ګټې اخیستنې ته وسپارل. دغه زېرمتونونه ۴۱ یې د پیازو ساتنې او ۴۰ نور یې د کچالو ساتنې لپاره جوړ شوي دي. برخمن شوي بزګران اوس دکال څه باندې ۵۰۰ ټنه پیاز او کچالو چې د دوی له مصرف او پلور څخه زیاتیږي کولا شي، چې په دغو زېرمتونونو کې یې زېرمه کړي.
ددغو زېرمتونونو رغنیزې چارې د کرنې وزارت د بڼوالۍ ځنځیري ارزښت د پراختیا پروژې  (HVCDSP)له خوا پرمخ وړل کېدل.
ددغو زېرمتونونو ټولیز لګښت ۴۴ میلیونه او ۸۰۶ زره او ۴۱۸ افغانۍ ده. د پیازو د زېرمتونونو لګښت ۲۰ میلیونه او ۱۸۵ زره او ۸۵۸ افغانۍ او دکچالو د زېرمتونونو لګښت ۲۴ میلیونه او ۶۲۰ زره او ۵۶۰ افغانۍ ده. ددې لګښت ۸۰ سلنه دکرنې وزارت او ۲۰ سلنه نور یې برخمن شوي بزګران ور کړي دي.
یاد زېرمتونونه هر یوه یې د ۱۲ مټریک ټنه پیاز او کچالو د ساتنې وړتیا لري. په ټولیزه توګه له دغو زېرمتونونو څخه په استفادې سره د پکتیا بزګران کولای شي، چې دکال نږدې ۴۹۲ مټریک ټنه پیاز او ۴۸۰ مټریک ټڼه کچالو زېرمه او په مناسب وقت کې یې بازار ته وړاندې کړي.
تېر کال د پکتیا ولایت په ۹۵۰ هکټاره ځمکه کې کچالو او ۷۳۰ هکټآره ځمکه کې پیاز کرل شوي ول. له دغو کروندو څخه نږدې ۱۵ زره او ۵۸۰ مټریک ټنه کچالو او ۱۰ زره او ۹۵۰ مټریک ټنه پياز تر لاسه شوي دي.