هلمند کې کروندګور لپاره د عملي او نظري زده کړو په موخه ننداریزې قطعې جوړې شوي دي
۱۶ چنګاښ ۱۳۹۹
د هلمند د کرنې، اوبولګولو او مالدارۍ ریاست چارواکي وایي، چې په دې ولایت کې بزګرانو او کروندګور لپاره د عملي او نظري زده کړو ورکولو په موخه د نباتي افتونو او ناروغیو د مخنیوي په برخه کې ننداریزې قطعې جوړې شوي دي.
د هلمند دکرنې رییس زلمی الکو وایي، چې ددې ولایت په مرکز لښکرګاه، نادعلي، ناوه او نهرسراج ولسوالیو کې د نباتي ناروغیو هر اړخیز مخنیوی (IPM) په موخه چې صنعتي نباتات، سابه او مېوې په کې شامل دي اته ننداریزې قطعې جوړې شوي دي.
د ښاغلي الکو په خبره په دې ننداریزو قطعو کې به بزګرانو او کروندګرو ته د بېلابېلو نباتي ناروغیو د میخانیکي مخنیوی لارې چارې په عملي او نظري ډول ور وښودل شي.
دیادې پروسې له لارې به بزګر وتوانیږي ترڅو په اسانۍ سره مخکې تر دې، چې نباتي ناروغۍ او افتونه یې پر کښتونو حمله وکړي مخه یې ونیسي، چې په دې سره به دبزګرو د صنعتي نباتاتو، سبو او مېوو کمیت او کیفیت ښه او لوړ حاصلات به ترلاسه کړي.
