دمیدان وردګو د بهسودو لومړی حصې ولسوالی د سربند جوړولو چارې ۹۵ سلنه بشپړې شوې دي
۱۹ لړم ۱۴۰۵ هـ.ش
۲۹ جُمَادَى الأول ۱۴۴۸ هـ.ق
د کرنیزو ځمکو د خړوبولو، د اوبو د مدیریت او د بزګرانو او مالدارانو د ملاتړ په موخه، د میدان وردګو ولایت د بهسودو لومړی حصې ولسوالی د کلیوالي هوساینې د پراختیا پروژې په چوکاټ کې د سربند جوړولو چارې د بشپړېدو په درشل کې دي او شاوخوا ۹۵ سلنه کارونه یې ترسره شوي دي.
د میدان وردګو ولایت د بهسودو لومړی حصې ولسولی کې د ډاکار مؤسسې له لوري، د دغه ولایت د کرنې، اوبولګولو او مالدارۍ ریاست په همغږۍ د کلیوالي هوساینې د پراختیا پروژې په چوکاټ کې د جوړېدونکي سربند له چارو څارنه ترسره شوه.
د څارنې پر مهال څرګنده شوه، چې د یاد سربند د جوړولو چارې د پلان له مخې په ښه توګه پرمخ روانې دي او تر دې مهاله یې شاوخوا ۹۵ سلنه کارونه بشپړ شوي دي. تمه ده، چې دغه پروژه به په نږدې ورځو کې بشپړه او ګټې اخیستنې ته وسپارل شي.
د یادې ولسوالی بزګران او مالداران د دې پروژې د پلي کېدو او بشپړېدو په اړه خوښي څرګندوي او وایي، چې د سربند په جوړېدو سره به د کرنیزو ځمکو د خړوبولو او د اوبو د مدیریت په برخه کې اسانتیاوې رامنځته شي او د دوی پر کرنیزو فعالیتونو او مالدارۍ به مثبت اغېز وکړي.
هغوی د ورته پروژو د پلي کېدو غوښتنه هم کړې، څو د کرنې او مالدارۍ د ودې، د کلیوالو د اقتصادي وضعیت د ښهوالي او د قدرتي سرچینو د سم مدیریت لپاره لا ډېرې اسانتیاوې برابرې شي.
د یادونې وړ ده، چې د سربندونو او د اوبو زېرمه کولو د نورو بنسټیزو پروژو جوړول د کرنیزو ځمکو د خړوبولو، د اوبو د ضایعاتو د مخنیوي او د بزګرانو او مالدارانو د اقتصادي ملاتړ په برخه کې مهم رول لري.
