د کرنې وزارت د پلان او پروګرامونو د همغږۍ لوی ریاست له ولایتي مسوولینو سره د همغږۍ غونډه وکړه

۳۰ وږی ۱۴۰۵ هـ.ش

۸ رَبِیعُ الْثاني ۱۴۴۸ هـ.ق

د کرنې، اوبو لګولو او مالدارۍ وزارت د پلان او پروګرامونو د همغږۍ لوی ریاست د ولایتي مسوولینو په ګډون د همغږۍ انلاین غونډه ترسره کړه.

په دې انلاین غونډه کې د پلان او پالیسۍ، کرنیزو احصائیو، خصوصي سکټور پراختیا، څارنې او ارزونې مسوولینو، سلاکارانو، آمرینو او د مالي او حسابي او تدارکاتو ریاستونو استازو ګډون کړی و.

دغه غونډه د کرنې، اوبو لګولو او مالدارۍ وزارت مقام د لارښوونې پر بنسټ، د بغلان، کندز، بدخشان، تخار، سرپل، سمنگان، بلخ، جوزجان او فاریاب ولایتونو د کرنې، اوبو لګولو او مالدارۍ ریاستونو د پلان رییسانو، آمرینو، سلاکارانو او د پلان مدیرانو په ګډون ترسره شوه.

په دې ناسته کې اداري ستونزې او ننګونې، د منظور شوي پلان له مخې د بودجې د لګښت کچه، د پراختیايي پروژو د پلي کېدو پر وړاندې شته خنډونه او د هغو پروژو د پلان جوړولو او پلي کولو څرنګوالی، چې د همکارو موسسو له لارې تطبیقېږي، تر بحث او ارزونې لاندې ونیول شول.

همدارنګه، د ستونزو د هواري، د کاري بهیر د ښه والي او په کرنیز سکټور کې د چارو د چټکتیا په موخه د اړینو لارو چارو په اړه د نظرونو تبادله وشوه.

د غونډې په پیل کې د کرنې، اوبو لګولو او مالدارۍ وزارت د پلان او پروګرامونو د همغږۍ لوی رییس الحاج مولوي عبدالعلي عمري د ګډونوالو له ګډون څخه خوښي څرګنده کړه او د مرکزي او ولایتي ریاستونو ترمنځ یې پر لا زیاتې همغږۍ ټینګار وکړ.

ورپسې، د پلان او پالیسۍ، کرنیزو احصائیو، څارنې او ارزونې او خصوصي سکټور د پراختیا برخو مسوولینو د خپلو کاري برخو اړوند معلومات او راپورونه وړاندې کړل. وروسته ولایتي مسوولینو ته فرصت ورکړل شو، څو خپلې ستونزې، وړاندیزونه او له کاري چارو سره اړوند موضوعات مطرح کړي.

په پای کې، د پلان او پروګرامونو د همغږۍ لوی ریاست سلاکار د مطرح شویو موضوعاتو په اړه لازم معلومات وړاندې کړل او د کاري بهیر د ښه والي او ستونزو د هواري په موخه یې مناسبې لارې چارې له ولایتي مسوولینو سره شریکې کړې.

ګډونوالو د مرکزي او ولایتي ریاستونو ترمنځ د اړیکو او همغږۍ د پیاوړتیا او د پروګرامونو د پلي کېدو د بهیر د ښه والي په موخه د دا ډول همغږۍ غونډو پر دوام ټینګار وکړ.