بادغیس کې د بروسلوز ناروغۍ د سروې او څارویو څخه د وینې اخیستلو پروژه پیل شوه

۲۷ زمری ۱۴۰۵ هـ.ش
۴ رَبِیعُ الْأَوَّل ۱۴۴۸ هـ.ق
د بادغیس ولایت د کرنې، اوبولګولو او مالدارۍ ریاست له لوري په دغه ولایت کې د بروسلوز ناروغۍ د موجودیت او خپرېدو د کچې د معلومولو په موخه د دې ناروغۍ د سروې او له څارویو څخه د وینې د نمونو اخیستلو پروژه پیل شوه.
د یادې سروې په لړ کې ټاکل شوې چې د حیواني روغتیا د لسو  کلینیکونو له لارې له څارویو څخه له ۶۰ څخه زیات د وینې نمونې واخیستل شي. له اخیستل شویو نمونو څخه به سیروم جلا او د لابراتواري معایناتو او دقیق تشخیص په موخه د هېواد مرکز د مالدارۍ او حیواني روغتیا عمومي ریاست ته واستول شي.
د دې پروژې موخه په بادغیس ولایت کې د بروسلوز ناروغۍ د موجودیت د کچې معلومول، د ناروغۍ د خپرېدو احتمالي مواردو پېژندل او د حیواني ناروغیو د کنټرول او مخنیوي لپاره د کره معلوماتو برابرول دي.
یاد پروګرام د مالدارۍ او حیواني روغتیا آمریت د حیواني روغتیا برخې تر څارنې او کنټرول لاندې عملي کېږي او لګښتونه یې د بادغیس ولایت د کرنې، اوبولګولو او مالدارۍ ریاست له بودجې څخه ورکول کېږي.
بروسلوز یوه ساري حیواني ناروغي ده، چې د څارویو د روغتیا ترڅنګ د مالدارۍ د تولید پر کچه هم منفي اغېز کولی شي. د دې ناروغۍ د مخنیوي او کنټرول لپاره د ناروغۍ د موجودیت معلومول، پر وخت تشخیص او د لابراتواري ازموینو له لارې د مشکوکو مواردو تثبیت مهم ګڼل کېږي. په همدې موخه د بادغیس ولایت د کرنې، اوبولګولو او مالدارۍ ریاست له لوري د وینې د نمونو اخیستلو او لابراتواري سروې دغه پروګرام پيل شوی، څو د ناروغۍ په اړه کره معلومات راټول او د کنټرول لپاره لازم اقدامات ترسره شي.