د خوست جوارسل څېړنیز فارم څخه د متخصصینو لیدنه؛ د غنمو اصلاح او نباتي ناروغیو پر څېړنو ټینګار وشو
د خوست ولایت د کرنې، اوبو لګولو او مالدارۍ ریاست د کرنیزو چارو آمریت اړوند د څېړنو لوی مدیریت په چوکاټ کې، د جوارسل څېړنیز فارم څخه د څېړنو انسټیټوټ ریاست راغلي تخنیکي پلاوي لیدنه ترسره شوه.
یاده لیدنه د فارم د روانو څېړنیزو فعالیتونو د ارزونې، د علمي چارو د څارنې او د تخنیکي همغږۍ د لا پیاوړتیا په موخه ترسره شوې وه، چې په ترڅ کې یې محمد افضل قریشي د غنمو د اصلاح متخصص او اسدالله میاحیل د صنعتي او پالېدونکو نباتاتو د امراضو متخصص ګډون درلود.
راغلو متخصصینو د فارم له بېلابېلو برخو څخه هر اړخیزه لیدنه وکړه، چې پکې د غنمو د بریډر تخمونه، هستوي غنم، د اصلاح تجربې، او د نباتي امراضو اړوند بېلابېلې څېړنیزې تجربې شاملې وې.
همدارنګه، یاد پلاوي د خوست تخنیکي ټیم او متخصصینو سره د نباتي امراضو د سکورینګ (ارزونې)، د غنمو د اصلاح تجربو د معلوماتو راټولولو، د مناسب ورایټیو ټاکنې، د پروجیني د کښت طریقو او نورو مهمو علمي او تخنیکي موضوعاتو په برخه کې لازمې مشورې او همکارۍ وړاندې کړې.
راغلو متخصصینو د جوارسل څېړنیز فارم ترسره شوي فعالیتونه، روانې څېړنې او کرل شوي نباتات مثبت وارزول او د فارم د کارکوونکو او متخصصینو هڅې یې وستایلې.
دوی ټینګار وکړ، چې دا ډول تخنیکي لیدنې د څېړنیزو چارو د پیاوړتیا، د علمي همغږۍ د پراختیا او د کرنیزو تولیداتو د کیفیت د لوړوالي لپاره مهم رول لري.
