د چرګانو روزنې د فارمونو د وقایې په پار هلې ځلې
۲۹ مرغومي ۱۳۹۸
د ننګرهار د کرنې، اوبولګولو او مالدارۍ ریاست په دې ولایت کې د چرګانو روزنې د فارمونو د وقیایې په پار هلې ځلې کړندي کړي دي. په وروستۍ بېلګه کې یې د ننګرهار دکرنې سرپرست ډاکټر محمدضمیر بهسودي د سراچې پله ترڅنګ پاکستان څخه د راوړل شویو چرګوړو څخه څارنه او نظارت وکړ.
د ښاغلي بهسودي په خبره ددې نظارت موخه د هغو یو ورځنیو چرګوړو د واردولو مخنیوی دی، چې روغتیایي سند ونه لري.
د ننګرهار د کرنې سرپرست رییس او ورسره مل پلاوي د راوړل شویو چرګوړو روغتیایي اسناد او ګمرکي سندونه ولیدل او ویې ویل هغو چرګوړو ته به د راتګ اجازه ورنکړي، چې روغتیایي سند و نه لري.
ښاغلي بهسودي ددې کار موخه په هېواد کې د چرګانو روزنې د فارمونو وقایه او د چرګانو د ناروغیو د خپرېدو مخنیوي بولې او زیاتوي، چې د ولایت د مقام له مشرتابه او ښکېلو خواوو سره په هغږۍ یې پلان چمتو کړئ دی، چې پر بنسټ یې د سرغړوونکو مخه نیول کیږي.
