کندز کې د «یوریا سپرې» او «مورپتدار» افت پر ضد کمپاینونه په منظم ډول روان دي
۲۴ لیندۍ ۱۴۰۴ هـ.ش
۲۴ جُمَادَى الثاني ۱۴۴۷ هـ.ق
د کندز ولایت د کرنې، اوبو لګولو او مالدارۍ ریاست د مېوه لرونکو بڼونو د ساتنې او د نباتي افاتو د خپرېدو د مخنیوي په موخه د بوټو ساتنې د څانګې له لارې د «یوریا سپرې» او د «مورپتدار» افت پر ضد کمپاینونه پیل کړي دي. دغه کمپاینونه دا مهال په اغېزمن ډول د امامصاحب، قلعهذال او چهاردرې ولسوالیو کې جریان لري.
یاد پروګرام په ۷ هغو کلیو کې تطبیق شوی چې مېوه لرونکي بڼونه لري، او تر اوسه له ۱۰۰ تنو څخه ډېرو بڼوالو ته د افاتو د پېژندنې، د مخنیوي لارو چارو، د یوریا سپرې د سم استعمال او د مورپتدار افت پر ضد د اغېزمنې مبارزې په اړه عملي او نظري پوهاوی ورکړل شوی دی.
همدارنګه، د دې کمپاین په ترڅ کې له ۴۴ زرو او ۵۰۰ څخه زیاتې مېوه لرونکې ونې تر پوښښ لاندې راغلې او پرې لازم حفاظتي اقدامات عملي شوي دي. د دې پروګرام تطبیق به د افاتو له امله د رامنځته کېدونکو زیانونو په کمولو، د بڼونو د روغتیا په ښه کولو او د بڼوالو د حاصلاتو په زیاتولو کې مهم رول ولوبوي.
