اچین کې د نږدې ۱۸ میلیونه افغانیو په لګښت د څلورو سربندونو د جوړولو چارې پیل شوې
۱۲ مرغومي ۱۳۹۸
د ننګرهار د کرنې، اوبولګولو او مالدارۍ ریاست چارواکي وایي، چې ددې ولایت د اچین ولسوالۍ اړوند د «پیروخیل، اشخېل، پاخېل او لالي چيني» د سربندونو د رغولو چارې رسماً پیل شوي دي.
د ننګرهار د کرنې رییس ډاکټر محمد ضمیر بهسودي وایي، ددغو سربندونو د جوړولو ټولیز لګښت نږدې ۱۸ میلیونه افغانۍ ده، چې د رغولو چارې به یې تر راتلونکو شپږو میاشتو پورې بشپړ او ګټې اخیستنې ته به وسپارل شي.
ښاغلي بهسودي وویل، یاد سربندونه په پاخه او اساسي توګه جوړیږي، چې په جوړېدو سره به یې شاوخوا دوه زره او ۷۵۰ جریبه ځمکه خړوبه شي.
د ننګرهار د کرنې رییس له ولسونو وغوښتل چې د یادو پروژو د ښه تطبیق او روڼتیا په موخه یې څارنه او نظارت ترسره کړي.
د دې پروژې پلي کول که له یوې خوا د اوبو د ضایعاتو مخه نیسي له بلې خوانه د دې سیمې د کرنیزو محصولاتو د کیفیت او کچې په لوړولو کې مرسته کوي او د بزګرانو په اقتصادي وده کې به رغنده رول ولري.
