دلغمان د کرنې رییس د کرنې وزارت د کرنیزو تخمونو د تصدیق کولو رییس سره وکتل

۲۴ لړم ۱۴۰۴ هـ.ش
۲۴ جُمَادَى الأول ۱۴۴۷ هـ.ق
دلغمان د کرنې، اوبولګولو او مالدارۍ رییس ا مولوي عبدالستار محمد د خپل کار په دفتر کې د کرنې وزارت د کرنیزو تخمونو د تصدیق کولو رییس مولوي صدیق الله رحماني او د یاد ریاست له نورو کارکوونکو سره د چارو د همغږۍ په موخه وکتل.
په دې لیدنه کې د پلاوي مشر مولوي صدیق الله رحماني وویل، د دوی د سفر موخه د نیالګیو د قوریو کنټرول او ارزونه ده. هغه زیاته کړه چې هغه نیالګي چې د بڼوالۍ په برخه کې د کښت لپاره کارول کېږي، باید له تصدیق شوو قوریو څخه اخیستل شوي وي او د معیار مطابق لیبل ولري.
نوموړي وویل، دا مهال په لغمان ولایت کې څلور تصدیق شوې قورې موجودې دي او هڅه کېږي چې د ټول هېواد په کچه د نیالګیو د اصلاح لپاره قورې د کرنې وزارت له معیارونو سره سمې عیارې شي. همدارنګه یې څرګنده کړه، چې پرته له تصدیق شوو قوریو هېڅوک حق نه لري چې نیالګي وپلوري.
رحماني د کرنې ریاست ته لارښوونه وکړه، چې هغه مؤسسات او بڼوال چې نیالګي رانیسي، باید تصدیق شوو قوریو ته ور وپېژندل شي او په دې برخه کې لازمې پاملرنې ته متوجه شي.
د لغمان د کرنې رییس مولوي عبدالستار محمد د پلاوي هرکلی او مننه وکړه، چې د قوریو د کنټرول په موخه یې لغمان ته سفر کړی دی. هغه یاد اقدام ګټور وباله او ډاډ یې ورکړ چې ټولې قورې به د کرنې وزارت د پالیسي له مخې عیارې کړای شي.
نوموړي د ریاست اړوند کارکوونکو ته لارښوونه وکړه، چې له پلاوي سره هر اړخیزه همکاري وکړي.