۳ مرغومی ۱۳۹۸
د ننګرهار د کرنې، اوبولګولو او مالدارۍ ریاست د کرنې د ودې او کلیوالي پراختیا (CBARD) پروژې په همکارۍ ددې ولایت د «کوټ، اچین، چپرهار، رودات، خوګیاڼیو او شیرزاد» ولسوالیو پر ۱۳۲ لویو شنوخونو لرونکو د خوراکي توکو د پروسس توکي وېشلي دي.
د ننګرهار د کرنې سرپرست رییس ډاکټر ضمیر بهسودي وويل، چې دغه وېشل شوي توکي د شنوخونو لرونکو او د یادو ولسوالیو اوسیدونکو ته ګڼې اسانتیاوې رامنځته کوي او د خوړو د پروسس په برخه کې له دوی سره مرسته کوي.
د ښاغلي بهسودي په خبره د مرسته شویو توکو د یوې بستې لګښت نږدې ۵۰ زره افغانۍ ده، چې ۳۹ توکي په کې شامل دي.
له یادو مرستو څخه برخمن شوي کولای شي، چې د پروسس شویو توکو یوه برخه په خپلو کورونو کې مصرف کړي او ډېره برخه یې په سیمه ییزو بازارونو کې وپلوري.
د دغو توکو له وېش څخه موخه د کرنیزو محصولاتو پروسس، دخوړو خوندیتوب تامینول او خلکو لپاره کارموندنه ده.