د کندهار خاکریز کې ۵۰ تنه کروندګر د اوبو سپما او اغېزمن مدیریت په برخه کې وروزل شول

۲۹ وږی ۱۴۰۴ هـ.ش
۲۷ رَبِیعُ الْأَوَّل ۱۴۴۷ هـ.ق
د کندهار د کرنې، اوبو لګولو او مالدارۍ ریاست په هڅو، د اروپایي ټولنې په مالي ملاتړ، د هالنډ کمیټې په تخنیکي همکارۍ د خاکریز ولسوالی د سبزل کاریز په سیمه کې ۵۰ تنه کروندګرو ته د اوبو سپما، اغېزمن مدیریت،  د اوبو د ارزښت او زیانونو په موخه روزنه ورکړل شوه.
یاده روزنیزه غونډه د خاکریز ولسوالی د اړوندو مسوولینو تر څارنې لاندې ترسره شوه، چې پکې د کندهار د کرنې ریاست استازو، د هالنډ کمیټې مسوولینو، د ولسوالی استازو او ګڼ شمېر کروندګرو ګډون کړی ؤ.
د روزنې پر مهال، د هالنډ کمیټې مسلکي کارکوونکو کروندګرو ته د اوبو ارزښت، د اوبو کمښت له امله احتمالي راتلونکې ستونزې، د سپما لارو چارو، او د مؤثرې استفادې تخنیکي حل‌لارې تشریح کړې. کروندګرو ته سپارښتنه وشوه، چې د خپلو کرنیزو ځمکو لپاره د اوبو څاڅکي (قطري) سیستمونه فعاله کړي، ترڅو له اوبو څخه اعظمي ګټه واخیستل شي، همداراز، دوی ته لارښوونه وشوه، چې له غیرضروري او ژورو برمو څخه ډډه وکړئ، تر څو د اوبو سطحه ثابته وساتل شي.
د روزنې له پای ته رسېدو وروسته، د کاریز اوبو د اغېزمن مدیریت او د ضایعاتو د مخنیوي په موخه د بزګرانو له‌منځ څخه یوه ګډه کمیټه هم جوړه شوه. دا کمیټه به د کاریز اوبو ساتنه، مدیریت، او د موجوده امکاناتو څخه مؤثره استفاده کوي.
د یادونې وړ ده، چې درې میاشتې وړاندې، د اروپایي ټولنې په مالي ملاتړ د سبزل کاریز په سیمه کې د اوبو د زېرمه کولو لپاره یو اساسي او معیاري حوض جوړه شوې وه، او دا د دویم ځل ده چې بزګرانو ته پدې اړه روزنه ورکول کېږي. دا چاره د بزګرانو د عامه پوهاوي د لوړوالي او د اوبو د ښه کارونې لپاره ترسره شوې ده.