لغمان کې د کرنې او مالدارۍ پراختیا په پار سکتوري غونډه ترسره شوه

۲۰ وږی ۱۴۰۴ هـ.ش
۱۸ رَبِیعُ الْأَوَّل ۱۴۴۷ هـ.ق
د لغمان د کرنې، اوبولګولو او مالدارۍ ریاست له خوا، په دې ولایت کې د سکتوري ادارو او ټولو هغو مؤسسو د استازو په ګډون سکتوري غونډه ترسره شوه، چې د کرنې او مالدارۍ په برخه کې فعالیت لري.
یاده غونډه، چې د لغمان ولایت د کرنې رییس مولوي عبدالستار محمد په مشرۍ جوړه شوه، پکې د ژوند چاپېریال ساتنې او اقتصاد ریاستونو استازو، د کرنې، اوبولګولو او مالدارۍ ریاست آمرینو، او د اسلامي هوساینې نړۍوالې ادارې، سرف افغانستان، هالینډ کمېټې، باغبان بزرگ شرکت، «ان.سي.آر.او»، غذا او تحصیل مؤسسو مسؤلینو ګډون کړی وو.
د غونډې په پیل کې د کرنې رییس مولوي عبدالستار محمد د همکارو برنامو د تېرو کړنو راپورونه او راتلونکې طرحې واورېدې، او وروسته یې د همکارو مؤسسو مسؤلینو ته سپارښتنه وکړه، چې ټولې پروژې دې د یاد ریاست سره په همغږۍ پلي شي، څو د تکراري پروژو مخه ونیول شي، د خدمتونو عادلانه وېش، متوازنه پراختیا او شفافیت تامین شي.
همداراز ښاغلي محمد له مؤسسو وغوښتل، چې د روانو اورښتونو او وچکالۍ له امله زیانمنو بزګرانو او مالدارانو د لاسنیوي لپاره د مرستو پروګرامونه زیات کړي، د جلغوزیو حاصلاتو د راټولولو لپاره عامه پوهاوي او د مېوې د شکولو وسایلو پروګرامونه پلي کړي، او د شنو ونو د اصلاح لپاره د پیستې پیوند کولو برنامې تطبیق کړي.
د یادونې وړ ده، چې د کرنې سکتوري غونډه په میاشت کې یو ځل د اړوندو ادارو او مؤسسو ترمنځ د لا ښې همغږۍ رامنځته کولو په موخه ترسره کېږي.