کاپیسا کې د یوې ستر او معياري سړې خونې د بنسټ ډبره کېښودل شوه

۱۶ وری ۱۳۹۹
کاپیسا کې د یوزر او ۵۰۰ ټنه په وړتیا دیوې ستر او معياري سړې خونې د جوړولو چارې پیل شوې.
ددې سړې خونې د بنسټ ډبره د ملي پراختیا شرکت مشر عبدالرحمان عطاش، د کرنې وزارت د اوبولګولو او طبیعي سرچینو مرستیال حشمت‌الله غفوري او د کاپیسا والي عبداللطیف مراد له خوا کېښودل شو.
دغه سړه خونه د کرنې، اوبولګولو او مالدارۍ وزارت له خوا ډیزاین او د ملي تدارکاتو له خوا منظور شوې او د جوړولو چارې یې د ملي پراختیا شرکت ته ورکړل شوې ده. په همدې توګه د جوړولو چارې یې د عملیاتي څانګې له لارې ترسره کیږي.
ټاکل شوې، چې په دې سړه خونه کې د پروسس یو مرکز هم جوړ شي.
دغه راز ټاکل شوې، چې په ۱٠ ولایتونو کې ۱۲ سړې خونې، چې د هر یوه وړتیا به یو زر او ۵۰۰ ټنه وي جوړ شي.
د دغو سړوخونو د هریوه د جوړولو لګښت نږدې ۱۸۰ میلیونه افغانۍ ده.
دغه جوړېدونکي سړې خونې په لمریز برېښنا سمبالیږي ترڅو سوداګر او بزګرانو ته لازیاتې اسانتیاوې برابرې کړي.
یاد سړې خونې به تر راتلونکې دوو کلونو پورې ګټې اخیستنې ته وسپارل شي.