کاپیسا کې دکرنیزو محصولاتو مدیریت د پروژې چارې ډېر ژر بشپړیږي
۲۹ تله ۱۳۹۹
د کاپیسا د کرنې، اوبولګولو او مالدارۍ ریاست وایي، چې په دې ولایت کې د کرنیزو محصولاتو مدیریت د اړوندو پروژو چارې ۷۰ سلنه بشپړ شوي دي او پاتې چارې به یې هم ډېر ژر بشپړ او ګټې اخیستنې ته به وسپارل شي.
دکرنې وزارت د کرنیزو محصولاتو مدیریت د پروژې په اډانه کې د کاپیسا په ولایت کې ۱۷۷ نوي کرنیزې پروژې پیل کړي، چې په کې ۱۰۰ ممیزخونې، د کچالو ۴۰ او د پیازو ۲۰ زېرمتونونه او د مڼو ۱۲ صفر انرژۍ سړې خونې جوړول شامل دي، چې رغنیزې چارې یې ۷۰ سلنه بشپړ شوي دي. دغه راز ددې پروژې له لارې پر کروندګرو مېرمنو د سبو او مېوو ۵۰ لمریز وچوونکي دستګاوې هم وېشل شوي دي. دیادو پروژو ټولیز لګښت ۱۲۰ میلیونه افغانۍ ده، چې لس سلنه یې د برخمن شوي کسانو او ۹۰ سلنه یې د کرنې وزارت له خوا ورکول کیږي.
